Weeraryahanka Bayern Munich Harry Kane ayaa diyaar u ah inuu ku biiro Barcelona, waxaana uu dejiyey waqti uu go’aan kaga gaari doono mustaqbalkiisa.
Kane ayaa xilli ciyaareedkan si heer sare ah uga soo muuqday Bayern Munich, isagoo dhaliyay 17 gool tartamada oo dhan, isagoo ka hoos ciyaaraya tababare Vincent Kompany.
Qandaraaskiisa Bayern wuxuu dhacayaa sanadka 2027, balse mustaqbalkiisa fog ee kooxda ayaa wali ah mid aan la hubin.
Kane wuxuu leeyahay shardi siideyn oo gaaraya £57 milyan, kaas oo dhaqan geli doona xagaaga soo socda.
Kooxo badan, oo ay ku jiraan Barcelona iyo kooxo ka tirsan Premier League, ayaa durba la socday xaaladdiisa.
Sida laga soo xigtay wargeyska Sport ee Catalonia, Kane oo 32 jir ah ayaa ka fiirsanaya inuu u wareego Barcelona, balse wuxuu go’aanka kama dambaysta ah qaadan doonaa dhamaadka xilli-ciyaareedkan.
